Deuteronomy 26
Gahmasate le Sawma Khat
1TOPA note Pasian in na luah dingun hong piak nading gamah lutin la-a na ten uh ciangin, 2TOPA note Pasian in hong piak ding gam leihoih pana piang gahmasa pawlkhat la-in lawh sungah koih un. Tua ciangin TOPA note Pasian in a Min ten nadingin a teel nading munah paipih unla, 3tua huna zumngak siampipa kiangah, “TOPA in i pute tungah eite piak dingin a ciamsa gam ka tunna tuni-in TOPA na Pasian tungah ka pulakkhia hi,” na ci ding uh hi. 4Siampipa in na khut panun a lawh hong sang dinga TOPA note Pasian biakna-tau mai-ah a ngasuk ding hi. 5Tua ciangin TOPA note Pasian mai-ah, “Ka pa a vak kawikawi Aram-te hi-a, mi tawmkha tawh Egypt ah paisukin tua lai-ah teng uh a, tua pan tampi pha-in a vanglian minam lianpi khat a suak uh hi. 6Ahi hangin Egypt-te in kote hong bawlsia uh a, na haksa hong semsakin hong thuaksiasak uh hi. 7Tua ciangin TOPA ka pate uh Pasian tungah ka kiko uh a, TOPA in ka aw uh hong za-in ka gentheihna uh, hong kinengniam a ka nasepte uh hong mu hi. 8Tua ciangin TOPA in a thahat khut le a kizankhia ban tawh a lauhuai mahmah le a piandang limte le a lamdangte tawh Egypt panin hong paikhiatpih hi. 9Hih mun ciang hong puakin hih gam - bawngnawi le khuaizu luanna gam hong pia hi, 10tu-in TOPA aw, keimah nong piaksa leihoih-a piang gahmasa nang kong puak hi,” na cikhia ding uh hi. TOPA note Pasian mai-ah na lawh koihin ama mai-ah na kunsuk ding hi. 11Tuateh TOPA note Pasian in nang le na innkuanpihte hong piaksa na hoih khempeuh, Levi-te le no laka om pemtate tawh nuam na sa khawm ding uh hi. 12 A kumthumna sawm ah khat piak kumin na khawhsa khempeuh panun sawma khat na tuam koih khit uh ciangin Levi-te, pemtate, pa nei lote le meigongte in no khua sungah ne in a kham theih nadingun amaute na pia ding uh hi. 13Tua ciangin TOPA note Pasian kiangah, “Nong thupiak khempeuh tawh kituakin ka inn panin tanh siangtho ka khenkhia khina Levi-te, pemtate, pa neilote le meigongte ka pia khin hi. Na thupiakte panin pial loin tuate khatpeuh zong ka mangngilh kha kei hi. 14Ka khakhun sungin tua tanh siangtho ka ne kei-a, ka nit sungin zong tuate khatpeuh khenkhia loin misi an piakin zong ka zang kei hi. TOPA ka Pasian thu kong mang hi. Kei nong thupiak peuhmah ka sem khin hi. 15Na tenna mun siangtho van panin hong ensuk inla, na mi Israel le ka pute uh tungah kiciam-a na khapsa, bawngnawi le khuaizu luanna gam thupha hong pia in,” na ci ding uh hi.TOPA Thupiakte Zui Un
16 Tuni-in TOPA note Pasian in hih thukipte le thukhamte na lungsim khempeuh uh le na hinna khempeuh uh tawh limtaka na zuih dingun thu hong pia hi. 17Tuni-in TOPA note Pasian ahina, ama lampi tawnin a thukipte, a thupiakte le a thukhamte zui-in ama thu na man ding uh na pulak khin uh hi. 18Tua banah tuni-in TOPA in hong ciamsa bangin note ama mi, ama gou na hi uh a, a thupiak khempeuh na zuih dingun hong gen khin hi. 19Amah in a bawlsa minamte khempeuh tung pekah a kiphatzaw, a minthangzaw, a kipahtawizaw in hong koih dinga, ama hong ciamsa bangin TOPA note Pasian mi siangtho na suak ding uh hi. a
Copyright information for
ZomZIV